| Egvein | Дата: Вторник, 06.11.2012, 21:35 | Сообщение # 1 |
 ВЕРВОЛЬФ МУН АРВИАНДИЛЬ
Группа: Модераторы
Сообщений: 75
Статус: Offline
| Канон покаянный ко Господу нашему Иисусу Христу.
Глас 6.
Песнь 1
Ирмос: Яко посуху, пешешествовав Израиль по бездне стопами, гонителя фараона видя потопляема, Богу победную песнь поим вопияше.
Припев: Помилуй мя Боже, помилуй мя.
Ныне приступих аз грешный и обремененный к Тебе, Владыце и Богу моему; не смею же взирати на небо, токмо молюся, глаголя: даждь ми, Господи, ум, да плачуся дел моих горько.
Припев: Помилуй мя Боже, помилуй мя.
О, горе мне грешному! Паче всех человек окаянен есмь, покаяния несть во мне; даждь ми, Господи, слезы, да плачуся дел моих горько.
Слава Отцу и Сыну и Святому Духу: Безумне, окаянне человече, в лености время губиши; помысли житие твое, и обратися ко Господу Богу, и плачися о делех твоих горько.
И ныне и присно и во веки веков. Аминь: Мати Божия Пречистая, воззри на мя грешнаго, и от сети диаволи избави мя, да плачуся дел моих горько.
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Припев: Помилуй мя Боже, помилуй мя.
Внегда поставлени будут престоли на Судищи Страшнем, тогда всех человек дела обличатся; горе тамо будет грешным, в муку отсылаемым; и то ведущи, душе моя, покайся от злых дел твоих.
Припев: Помилуй мя Боже, помилуй мя.
Праведницы возрадуются, а грешнии восплачутся, тогда никтоже возможет помощи нам, но дела наша осудят нас; темже прежде конца покайся от злых дел твоих.
Слава Отцу и Сыну и Святому Духу: Увы мне, великогрешному, иже делы и мысльми осквернився, ни капли слез имею от жестокосердия; ныне возникни от земли, душе моя, и покайся от злых дел твоих.
И ныне и присно и во веки веков. Аминь: Се, взывает, Госпоже, Сын твой, и поучает нас на доброе, аз же грешный добра всегда бегаю; но Ты, Милостивая, помилуй мя, да покаюся от злых моих дел.
Седален, глас 6
Помышляю день страшный и плачуся деяний моих лукавых: како отвещаю Безсмертному Царю, или коим дерзновением воззрю на Судию, блудный аз? Благоутробный Отче, Сыне Единородный и Душе Святый, помилуй мя.
Слава Отцу и Сыну и Святому Духу и ныне и присно и во веки веков. Аминь: Богородичен: Связан многими ныне пленницами грехов и содержимь лютыми страстьми и бедами, к Тебе прибегаю, моему спасению, и вопию: помози ми, Дево, Мати Божия.
Песнь 4
Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.
Припев: Помилуй мя Боже, помилуй мя.
Широк путь зде и угодный сласти творити, но горько будет в последний день, егда душа от тела разлучатися будет: блюдися от сих, человече, Царствия Божия.
Припев: Помилуй мя Боже, помилуй мя.
Почто убогаго обидиши, мзду наемничу удержуеши, брата твоего не любиши, блуд и гордость гониши? Остави убо сия, душе моя, и покайся Царствия ради Божия.
Слава Отцу и Сыну и Святому Духу: О, безумный человече, доколе углебаеши, яко пчела, собирающи богатство твое? Вскоре бо погибнет, яко прах и пепел, но более взыщи Царствия Божия.
И ныне и присно и во веки веков. Аминь: Госпоже Богородице, помилуй мя грешнаго, и в добродетели укрепи, и соблюди мя, да наглая смерть не похитит мя неготоваго, и доведи мя, Дево, Царствия Божия.
Песнь 5
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога от мрака греховнаго взывающа.
Припев: Помилуй мя Боже, помилуй мя.
Воспомяни, окаянный человече, како лжам, клеветам, разбою, немощем, лютым зверем, грехов ради порабощен еси; душе моя грешная, того ли восхотела еси?
Припев: Помилуй мя Боже, помилуй мя.
Трепещут ми уди, всем бо сотворих вину: очима взираяй, ушима слышай, языком глаголяй, всего себе геене предаяй; душе моя грешная, сего ли восхотела еси?
Слава Отцу и Сыну и Святому Духу: Блудника и разбойника кающася приял еси, Спасе, аз же един леностию греховною отягчихся и злым делом поработихся; душе моя грешная, сего ли восхотела еси?
И ныне и присно и во веки веков. Аминь: Дивная и скорая помощнице всем человеком, Мати божия, помози мне недостойному, душа бо моя грешная того восхоте.
Песнь 6
Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Припев: Помилуй мя Боже, помилуй мя.
Житие на земли блудно пожих и душу во тьму предах, ныне убо молю Тя, Милостивый Владыко: свободи мя от работы сея вражия, и даждь ми разум творити волю Твою.
Припев: Помилуй мя Боже, помилуй мя.
Кто творит таковая, якоже аз? Якоже бо свиния лежит в калу, тако и аз греху служу. Но Ты, Господи, исторгни мя от гнуса сего и даждь ми сердце творити заповеди Твоя.
Слава Отцу и Сыну и Святому Духу: Воспряни, окаянный человече, к Богу, воспомянув своя согрешения, припадая ко Творцу, слезя и стеня; Той же, яко милосерд, даст ти ум знати волю Свою.
И ныне и присно и во веки веков. Аминь: Богородице Дево, от видимаго и невидимаго зла сохрани мя, Пречистая, и прими молитвы моя, и донеси я Сыну Твоему, да даст ми ум творити волю Его.
Кондак
Душе моя, почто грехами богатееши, почто волю диаволю твориши, в чесом надежду полагаеши? Престани от сих и обратися к Богу с плачем, зовущи: милосерде Господи, помилуй мя грешнаго.
Икос
Помысли, душе моя, горький час смерти и Страшный Суд Творца твоего и Бога: Ангел ибо грознии поймут тя, душе, и в вечный огнь введут; убо прежде смерти покайся, вопиющи: Господи, помилуй мя грешнаго.
Песнь 7
Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.
Припев: Помилуй мя Боже, помилуй мя.
Не надейся, душе моя, на тленное богатство и на неправедное собрание, вся бо сия не веси кому оставиши, но возопий: помилуй мя, Христе Боже, недостойнаго.
Припев: Помилуй мя Боже, помилуй мя.
Не уповай, душе моя, на телесное здравие и на скоромимоходящую красоту, видиши бо, яко сильнии и младии умирают; но возопий: помилуй мя, Христе Боже, недостойнаго.
Слава Отцу и Сыну и Святому Духу: Воспомяни, душе моя, вечное житие, Царство Небесное, уготованное святым, и тьму кромешную, и гнев Божий злым, и возопий: помилуй мя, Христе Боже, недостойнаго.
И ныне и присно и во веки веков. Аминь: Припади, душе моя, к Божией Матери и помолися Той, есть бо скорая помощница кающимся, умолит Сына Христа Бога, и помилует мя недостойнаго.
Песнь 8
Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Припев: Помилуй мя Боже, помилуй мя.
Како не имам плакатися, егда помышляю смерть, видех бо во гробе лежаща брата моего, безславна и безобразна? Что убо чаю, и на что надеюся? Токмо даждь ми, Господи, прежде конца покаяние.
Припев: Помилуй мя Боже, помилуй мя.
Како не имам плакатися, егда помышляю смерть, видех бо во гробе лежаща брата моего, безславна и безобразна? Что убо чаю, и на что надеюся? Токмо даждь ми, Господи, прежде конца покаяние.
Слава Отцу и Сыну и Святому Духу: Верую, яко приидеши судити живых и мертвых, и вси во своем чину станут, стари и младии, владыки и князи, девы и священницы; где обрящуся аз? Сего ради вопию: даждь ми, Господи, прежде конца покаяние.
И ныне и присно и во веки веков. Аминь: Пречистая Богородице, прими недостойную молитву мою и сохрани мя от наглыя смерти, и даруй ми прежде конца покаяние.
Песнь 9
Ирмос: Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово воплощено, Его же величающее, с небесными вои Тя ублажаем.
Припев: Помилуй мя Боже, помилуй мя.
Ныне к вам прибегаю, Ангели, Архангели и вся небесныя силы, у Престола Божия стоящи, молитеся ко Творцу своему, да избавит душу мою от силы вражия.
Припев: Помилуй мя Боже, помилуй мя.
Ныне плачуся к вам, святи патриарси, царие и пророцы, апостоли и святителие и вси избрании Христовы: помозите ми на суде, да спасет душу мою от муки вечныя.
Слава Отцу и Сыну и Святому Духу: Ныне к вам воздежу руце, святи мученицы, пустынницы, девственницы, праведницы и вси святи, молящиеся ко Господу за весь мир, да помилует мя в час смерти моея.
И ныне и присно и во веки веков. Аминь: Мати Божия, помози ми, на Тя сильнее надеющемуся, умоли Сына Своего, да поставит мя недостойнаго одесную Себе, егда сядет судяй живых и мертвых, аминь.
Молитва.
Владыко Христе Боже, Иже страстьми Своими страсти моя исцеливый и язвами Своими язвы моя уврачевавый, даруй мне, много тебе прегрешившему, слезы умиления; сраствори моему телу от обоняния Животворящаго Тела Твоего, и наследи душу мою Твоею Честною Кровию от горести, Еюже мя, сопротивник напои; возвыси мой ум к Тебе, долу поникший, и возведи от пропасти погибели: яко не имам покаяния, не имам умиления, не имам слезы утешительныя, возводящия чада ко своему наследию. Омрачихся умом в житейских страстей, не могу воззрети к Тебе в болезни, не могу согретися слезами, яже к Тебе любве. Но, Владыко Господи Иисусе христе, сокровище благих, даруй мне покаяние всецелое и серце люботрудное во взыскание Твое, даруй мне благодать Твою и обнови во мне зраки Твоего образа. Оставих Тя, не остави мене; изыди на взыскание мое, возведи к пажити Твоей и сопричти мя овцам избраннаго Твоего стада, воспитай мя с ними от злака Божественных Твоих таинств, молитвами Пречистыя Твоея Матере и всех святых Твоих, Аминь.
Молитва вторая.
Господи Иисусе Христе, Сыне Бога живаго, Творче неба и земли, Спасителю мира! Се аз, недостойный и паче всех грешнейший, смиренно колена сердца моего пред славою величества Твоего преклонив, воспеваю Крест и страдания Твоя и благодарение Тебе, Царю всех и Богу, приношу, яко благоизволил еси вся труды и всякия беды, напасти и мучения, яко человек понести, да всем нам во всяческих печалех, нуждах и озлоблениих состраждущий Помощник и Спаситель будеши. Вем, всесильне Владыко, яко вся сия Тебе убо не быша потребна, но человеческаго ради спасения, да всех нас искупиши от лютыя работы вражия, крест и страдания претерпел еси. Что убо воздам Тебе, человеколюбче, о всех, яже пострадал еси мене ради грешнаго? Не веем, душа бо и тело, и вся благая от Тебе суть, и вся моя – Твоя суть, и аз Твой есмь. Точию на бесчисленное Твое благоутробне Господи, милосердие надеяся, пою Твое неизреченное долготерпение, величаю неисповедимое истощание, славлю Твою безмерную милость, поклоняюся пречистым страстем Твоим и, вселюбезно лобызая язвы Твоя, вопию: помилуй мя грешнаго и сотвори, да не бесплоден будет во мне Крест Твой святый, да причащаяся зде с верою страданием Твоим, сподоблюся видети с славу Царствия твоего на небеси! Аминь.
Природы благость есть и в нас,
ведь мы её сыны...
|
| |
| |
